اردو ترجمہ · UrduUnverified translation

حضرت عمرو بن عوف مُزَنی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’مسلمانوں کے درمیان صلح جائز ہے سوائے ایسی صلح کے جو کسی حلال کو حرام یا کسی حرام کو حلال کر دے۔ مسلمان اپنی شرائط کے پابند ہیں سوائے اس شرط کے جو کسی حلال کو حرام یا کسی حرام کو حلال کر دے۔‘‘ (اسے ترمذی نے روایت کیا ہے اور صحیح کہا ہے اور دوسرے محدثین نے اس کا انکار کیا ہے کیونکہ اس کا ایک راوی کثیر بن عبداللہ بن عمرو بن عوف ضعیف ہے۔ ایسا محسوس ہوتا ہے کہ ترمذی نے کثرت طرق کی وجہ سے اسے صحیح قرار دیا ہے۔ اور ابن حبان نے حضرت ابوہریرہ رضی اللہ عنہ کی حدیث سے اسے صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’کوئی ہمسایہ اپنے ہمسائے کو اپنی دیوار میں لکڑی گاڑنے سے منع نہ کرے۔‘‘ پھر حضرت ابوہریرہ رضی اللہ عنہ کہتے ہیں: کیا وجہ ہے کہ میں تمھیں اس پر عمل پیرا ہونے سے گریز کرتے دیکھ رہا ہوں‘ اللہ کی قسم میں تو اسے تمھارے کندھوں پر ضرور رکھوں گا۔ (بخاری و مسلم)

اردو ترجمہ · UrduUnverified translation

حضرت ابو حمید ساعدی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کسی کے لیے حلال نہیں کہ وہ اپنے بھائی کی لاٹھی بھی اس کی خوشی اور رضامندی کے بغیر لے۔‘‘ (اسے ابن حبان اور حاکم نے اپنی اپنی صحیح میں روایت کیا ہے۔)