اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم جب مدینہ تشریف لائے تو وہاں کے لوگ پھلوں میں سال سال اور دو دو سال کی قیمت پیشگی ادا کرتے تھے۔ آپ نے فرمایا: ’’جو شخص پھلوں کی قیمت پیشگی ادا کرے تو اسے چاہیے کہ مقرر ماپ‘ مقرر تول اور مقرر مدت کے لیے ادا کرے۔‘‘ (بخاری و مسلم) اور بخاری میں [مَنْ أَسْلَفَ فِي ثَمَرٍ] کی بجائے [مَنْ أَسْلَفَ فِي شَیْیئٍ] کے الفاظ ہیں۔ یعنی ’’جو شخص کسی چیز میں پیشگی دے۔‘‘

اردو ترجمہ · UrduUnverified translation

حضرت عبدالرحمن بن ابزیٰ اور عبداللہ بن ابی اوفی رضی اللہ عنہما سے روایت ہے کہ ہم رسول اللہ صلی اللہ علیہ وسلم کے ساتھ (غزوات میں شرکت کر کے) غنیمت کا حصہ لیتے تھے۔ ملک شام کے کچھ نبطی لوگ ہمارے پاس آیا کرتے تھے‘ ہم انھیں گندم‘ جو اور منقیٰ اور ایک روایت میں زیتون کا بھی ذکر ہے‘ کی پیشگی رقم دے کر ایک مدت مقررہ تک بیع سلم کرتے تھے؟ پوچھا گیا کہ کیا وہ خود کھیتی باڑی کرتے تھے تو دونوں نے جواب دیا کہ ہم نے ان سے یہ کبھی دریافت نہیں کیا تھا۔ (بخاری)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس شخص نے لوگوں کا مال (بطور قرض) لیا اور وہ اس کے ادا کرنے کا ارادہ رکھتا ہو تو اللہ تعالیٰ اسے ادا کرنے کی توفیق دے گا اور جس شخص نے ان کے اموال ضائع کرنے کی نیت سے لیے تو اللہ تعالیٰ اسے ضائع کردے گا۔‘‘ (بخاری)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ انھوں نے کہا: اے اللہ کے رسول! فلاں شخص کا شام سے کپڑا آیا ہے۔ آپ بھی کسی کو بھیج کر دو کپڑے کشادگی تک ادھار خرید لیں۔ آپ نے اس کی طرف ایک آدمی بھیجا مگر اس نے (ادھار دینے سے) انکار کر دیا۔ (اسے حاکم اور بیہقی نے روایت کیا ہے۔ اس کے راوی ثقہ ہیں۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’رہن رکھے ہوئے جانور پر (اس پر آنے والے) مصارف و اخراجات کے بدلے میں سواری کی جاسکتی ہے۔ اور دودھ دینے والے جانور کا دودھ (اس پر آنے والے) اخراجات کے بدلے میں پیا جا سکتا ہے بشرطیکہ وہ رہن ہو۔ اور آدمی جو سواری کرتا ہے اور دودھ پیتا ہے‘ اس کے اخراجات کا ذمہ دار بھی وہی ہے۔‘‘ (بخاری)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’مرہونہ (گروی شدہ) چیز اس کے مالک سے روکی اور بند نہیں کی جائے گی۔ اس کا فائدہ بھی اسی کے لیے ہے اور تاوان کا بھی وہی ذمہ دار ہے۔‘‘ (اسے دارقطنی اور حاکم نے روایت کیا ہے‘ اس کے راوی ثقہ ہیں۔ ابوداود وغیرہ کے نزدیک اس کا مرسل ہونا محفوظ ہے۔)

اردو ترجمہ · UrduUnverified translation

حضرت ابورافع رضی اللہ عنہ سے روایت ہے کہ نبی صلی اللہ علیہ وسلم نے ایک شخص سے جوان اونٹ قرض لیا‘ پھر آپ کے پاس صدقے کے اونٹ آئے تو آپ نے (مجھے) ابورافع کو حکم دیا کہ اس شخص کو جوان اونٹ ادا کر دیا جائے۔ میں نے عرض کیا: اس سے بہتر سات سالہ اونٹ موجود ہے۔ آپ نے فرمایا: ’’یہی اسے دے دو کیونکہ بہترین آدمی وہ ہے جو ادائیگی میں سب سے اچھا ہو۔‘‘ (مسلم)

اردو ترجمہ · UrduUnverified translation

حضرت علی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ہر وہ قرض جو منافع کھینچ لائے‘ وہ سود ہے۔‘‘ (اسے حارث بن ابی اسامہ نے روایت کیا ہے۔ اس کی سند ساقط الاعتبار (ضعیف) ہے۔) اور اس کا کمزور شاہد بیہقی کے ہاں فضالہ بن عبید رضی اللہ عنہ کی حدیث ہے۔ اور بخاری میں ایک اور موقوف حدیث عبداللہ بن سلام رضی اللہ عنہ سے بھی مروی ہے۔