اردو ترجمہ · UrduUnverified translation

حضرت رفاعہ بن رافع رضی اللہ عنہما سے مروی ہے کہ نبی صلی اللہ علیہ وسلم سے پوچھا گیا کہ کون سی کمائی زیادہ پاکیزہ ہے؟ آپ نے فرمایا: ’’آدمی کے اپنے ہاتھ کی کمائی اور ہر قسم کی تجارت جو دھوکے اور فریب سے پاک ہو۔‘‘ (اسے بزار نے روایت کیا ہے اور حاکم نے صحیح قرار دیا۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ انھوں نے رسول اللہ صلی اللہ علیہ وسلم کو مکہ میں فتح مکہ کے سال یہ فرماتے ہوئے سنا: ’’بے شک اللہ اور اس کے رسول نے شراب‘ مردار‘ خنزیر اور بتوں کی تجارت کو حرام قرار دیا ہے۔‘‘ آپ سے پوچھاگیا: اے اللہ کے رسول! مردار جانور کی چربی کے متعلق آپ کیا فرماتے ہیں؟ کیونکہ اس سے کشتیوں کو طلا کیا جاتا ہے اور چمڑوں کو چکنا کیا جاتا ہے اور لوگ اسے جلا کر روشنی حاصل کرتے ہیں۔ آپ نے فرمایا: ’’نہیں‘ وہ بھی حرام ہے۔‘‘ پھر رسول اللہ صلی اللہ علیہ وسلم نے اس کے ساتھ ہی فرمایا: ’’اللہ تعالیٰ یہود کو غارت کرے‘ جب اللہ تعالیٰ نے ان پر چربیوں کو حرام کر دیا تو انھوں نے اسے پگھلا کر فروخت کیا اور اس کی قیمت کھائی۔‘‘ (بخاری و مسلم)

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے‘ وہ فرماتے ہیں کہ میں نے رسول اللہ صلی اللہ علیہ وسلم سے سنا‘ آپ فرما رہے تھے: ’’جب فروخت کرنے والے اور خریدنے والے میں اختلاف واقع ہو جائے اور ثبوت و شہادت کسی کے پاس نہ ہو تو صاحب مال کی بات معتبر ہو گی‘ یا وہ دونوں اس سودے کو چھوڑ دیں۔‘‘ (اسے پانچوں نے روایت کیا ہے اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت ابومسعود انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے کتے کی قیمت‘ بدکار عورت کی (بدکاری کی) کمائی اور کاہن کی شیرینی سے منع فرمایا۔ (بخاری و مسلم)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ وہ اپنے ایک تھکے ماندے اونٹ پر سفر کر رہے تھے۔ انھوں نے اسے چھوڑنے کا ارادہ کر لیا۔ حضرت جابر رضی اللہ عنہ کا بیان ہے کہ اتنے میں پیچھے سے نبی صلی اللہ علیہ وسلم مجھے آملے۔ آپ نے میرے لیے دعا فرمائی اور اونٹ کو مارا تو وہ ایسی تیز روی سے چلنے لگا کہ اس سے پہلے ایسی تیز رفتاری سے نہیں چلا تھا۔ آپ نے فرمایا: ’’مجھے یہ اونٹ ایک اوقیہ چاندی کے عوض فروخت کر دو۔‘‘ میں نے عرض کیا: نہیں! آپ نے پھر دوبارہ فرمایا: ’’مجھے یہ اونٹ بیچ دو۔‘‘ تو میں نے اسے ایک اوقیہ چاندی کے عوض آپ کو بیچ دیا اور شرط یہ طے کی کہ اپنے گھر والوں تک سوار ہو کر جاؤں گا۔ چنانچہ میں جونہی (مدینہ) پہنچا تو میں وہ اونٹ لے کر آپ کی خدمت میں حاضر ہو گیا۔ آپ نے اس کی نقد قیمت مجھے ادا فرما دی‘ پھر میں (رقم وصول کرکے) واپس آگیا تو آپ نے میرے پیچھے (اونٹ بھی) بھیج دیا اور فرمایا: ’’کیا تم نے میرے بارے میں گمان کیا کہ میں نے اس لیے قیمت کم کرائی تاکہ تیرا اونٹ لے لوں؟ اپنا اونٹ لے لے اور رقم بھی اپنے پاس رکھ‘ پس وہ تیرے لیے ہے۔‘‘ (بخاری و مسلم‘ یہ سیاق مسلم میں ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما ہی سے مروی ہے‘ وہ فرماتے ہیں کہ ہم میں سے ایک شخص نے اپنا غلام مدبر کردیا۔ اس غلام کے سوا اس کے پاس اور کوئی مال نہیں تھا۔ نبی صلی اللہ علیہ وسلم نے اس غلام کو بلوایا اور اسے فروخت کر دیا۔ (بخاری و مسلم)

اردو ترجمہ · UrduUnverified translation

حضرت میمونہ رضی اللہ عنہا نبی صلی اللہ علیہ وسلم کی زوجۂ محترمہ سے روایت ہے کہ ایک چوہیا گھی میں گر کر مر گئی۔ اس کے متعلق نبی صلی اللہ علیہ وسلم سے دریافت کیا گیا تو (جواب میں) آپ نے فرمایا: ’’اسے نکال کر باہر پھینک دو اور اس کے اردگرد کا گھی بھی باہر ڈال دو اور (بقیہ گھی) استعمال کر لو۔‘‘ (بخاری) نسائی اور احمد نے یہ اضافہ نقل کیا ہے: ’’منجمد گھی میں۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’جب چوہیا گھی میں گر جائے تو اگر گھی منجمد ہو تو اس چوہیا کو اور اس کے اردگرد کے گھی کو باہر پھینک دو اور اگر گھی مائع (سیال) ہو تو اس کے قریب بھی نہ پھٹکو۔‘‘ (اسے احمد اور ابوداود نے روایت کیا ہے۔ بخاری اور ابوحاتم نے اس پر وہم کا حکم لگایا ہے۔)

اردو ترجمہ · UrduUnverified translation

حضرت ابو زبیر رحمہ اللہ سے روایت ہے کہ میں نے حضرت جابر رضی اللہ عنہ سے بلّے اور کتے کی قیمت کے متعلق پوچھا تو انھوں نے جواب دیا کہ نبی صلی اللہ علیہ وسلم نے اس بارے میں زجر و توبیخ فرمائی ہے۔ (مسلم و نسائی) اور نسائی میں یہ اضافہ ہے: ’’شکاری کتے کے علاوہ۔‘‘

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ حضرت بریرہ رضی اللہ عنہا (لونڈی) میرے پاس آئی اور کہنے لگی: میں نے اپنے مالکوں سے نو (۹) اوقیہ چاندی پر مکاتبت کر لی ہے کہ ہر سال میں ایک اوقیہ ادا کرتی رہوں گی‘ لہٰذا (اس معاملے میں) میری مدد کریں۔ میں نے کہا: اگر تیرے مالکان کو یہ پسند ہو کہ میں تیری مجموعی رقم یک مشت ادا کر دوں اور تیری ولا میرے لیے ہو جائے تو میں ایسا کرنے کو تیار ہوں۔ حضرت بریرہ رضی اللہ عنہا یہ تجویز لے کر اپنے مالکان کے پاس گئی اور ان سے یہ کہا تو انھوں نے اسے تسلیم کرنے سے انکار کر دیا۔ حضرت بریرہ رضی اللہ عنہا ان کے پاس سے واپس آئی‘ اس وقت رسول اللہ صلی اللہ علیہ وسلم بھی تشریف فرما تھے۔ بریرہ رضی اللہ عنہا نے کہا: میں نے اپنے مالکوں کے سامنے وہ تجویز پیش کی تھی مگر انھوں نے اسے تسلیم کرنے سے انکار کر دیا ہے اور وہ کہتے ہیں کہ ولا ان ہی کے لیے ہو گی۔ یہ بات نبی صلی اللہ علیہ وسلم نے سنی اور حضرت عائشہ رضی اللہ عنہا نے بھی اس واقعے سے نبی صلی اللہ علیہ وسلم کو باخبر کیا تو آپ نے فرمایا: ’’اسے لے لو اور ان سے ولا کی شرط کر لو کیونکہ ولا کا حق دار وہی ہے جو آزادی دے۔‘‘ حضرت عائشہ رضی اللہ عنہا نے ایسا ہی کیا۔ اس کے بعد رسول اللہ صلی اللہ علیہ وسلم لوگوں میں خطاب فرمانے کھڑے ہوئے۔ اللہ تعالیٰ کی حمد و ثنا کی‘ پھر فرمایا: ’’لوگوں کو کیا ہوگیا ہے کہ ایسی شرطیں لگاتے ہیں جو کتاب اللہ میں نہیں۔ (یاد رکھو کہ) ہر وہ شرط جو کتاب اللہ میں نہیں وہ باطل ہے‘ خواہ سینکڑوں شرطیں ہی کیوں نہ ہوں۔ اللہ کا فیصلہ نہایت برحق ہے اور اللہ کی شرط نہایت ہی پختہ اور پکی ہے۔ اور ولا اسی کا حق ہے جو آزاد کرے۔‘‘ (بخاری و مسلم۔ یہ الفاظ بخاری کے ہیں۔) اور مسلم کے الفاظ یہ ہیں کہ آپ نے فرمایا: ’’اسے خرید لو اور آزاد کر دو اور ان سے ولا کی شرط کرلو۔‘‘

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ وہ فرماتے ہیں کہ حضرت عمر رضی اللہ عنہ نے ام ولد کو فروخت کرنے سے منع کیا اور فرمایا: یہ فروخت ہو سکتی ہے نہ ہبہ کی جا سکتی ہے اور نہ میراث میں تقسیم ہو سکتی ہے۔ جب تک مالک چاہے اس سے فائدہ اٹھائے اور جب مالک فوت ہو جائے تو وہ آزاد ہے۔ (اسے بیہقی اور مالک نے روایت کیا ہے اور کہا ہے کہ بعض نے اسے مرفوع کہا ہے جو وہم ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ وہ فرماتے ہیں کہ ہم ام ولد لونڈیوں کو نبی صلی اللہ علیہ وسلم کی موجودگی میں فروخت کردیا کرتے تھے۔ آپ اس میں کوئی قباحت و مضائقہ نہیں سمجھتے تھے۔ (اسے نسائی‘ ابن ماجہ اور دارقطنی تینوں نے روایت کیا ہے اور ابن حبان نے صحیح کہا ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے زائد از ضرورت پانی کے فروخت کرنے سے منع فرمایا ہے۔ (مسلم) اور ایک روایت میں یہ اضافہ ہے: اور آپ نے اونٹ کی جفتی کا معاوضہ لینے سے بھی منع فرمایا ہے۔

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے نر کی جفتی کے معاوضے کو ممنوع قرار دیا ہے۔ (بخاری)

اردو ترجمہ · UrduUnverified translation

حضرت ابن عمر رضی اللہ عنہما ہی سے روایت ہے کہ رسول اللہ صلی اللہ علیہ وسلم نے حبل الحبلہ کی بیع سے منع فرمایا ہے۔ اور یہ بیع دور جاہلیت میں (اس طرح) تھی کہ آدمی اونٹنی اس شرط پر خریدتا کہ اس کی قیمت اس وقت دے گا جب اونٹنی بچہ جنے‘ پھر وہ بچہ جو اونٹنی کے پیٹ میں ہے وہ (آگے ایک بچہ) جنے۔ (بخاری و مسلم۔ اور یہ الفاظ بخاری کے ہیں)

اردو ترجمہ · UrduUnverified translation

حضرت ابن عمر رضی اللہ عنہما ہی سے یہ بھی مروی ہے کہ رسول اللہ صلی اللہ علیہ وسلم نے ولا کے فروخت کرنے اور اس کے ہبہ کرنے سے منع فرمایا ہے۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے کنکری پھینک کر تجارت کرنے اور دھوکے کی تجارت سے منع فرمایا ہے۔ (مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے روایت ہے‘ رسول اللہ صلی اللہ علیہ وسلم نے فرمایا: ’’جو شخص کوئی غلہ خریدے تو وہ جب تک اسے ماپ تول نہ لے اسے (آگے) فروخت نہ کرے۔‘‘ (مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے ایک بیع میں دو بیعوں سے منع فرمایا ہے۔ ( اسے احمدا ور نسائی نے روایت کیا ہے،نیز ترمذی اور ابن حبان نے اسے صحیح قرار دیا ہے۔) اور ابوداود کی روایت میں ہے: (رسول اللہ صلی اللہ علیہ وسلم نے فرمایا:) ’’جس کسی نے ایک سودے میں دو سودے کیے‘ اسے یا تو کم ملے گا یا پھر وہ سود لے گا۔‘‘

اردو ترجمہ · UrduUnverified translation

حضرت عمرو بن شعیب اپنے والد (شعیب) سے اور وہ (شعیب) اپنے دادا (عبداللہ بن عمرو رضی اللہ عنہما ) سے روایت کرتے ہیں‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’قرض اور بیع (ایک ساتھ) حلال نہیں اور نہ ایک بیع میں دو شرطیں حلال ہیں۔ اور کسی چیز کا منافع حاصل کرنا اسے اپنے قبضے میں لینے سے پہلے جائز نہیں۔ اور جو چیز تیرے (اپنے) پاس موجود نہ ہو اس کا فروخت کرنا بھی جائز و حلال نہیں۔‘‘ (اسے پانچوں نے روایت کیا ہے‘ نیز امام ترمذی‘ امام ابن خزیمہ اور امام حاکم تینوں نے اسے صحیح قرار دیا ہے۔) امام حاکم نے علوم الحدیث میں امام ابوحنیفہ رحمہ اللہ کی روایت سے مذکورہ حضرت عمرو رحمہ اللہ کے واسطے سے ان الفاظ کے ساتھ روایت کیا ہے: آپ نے بیع شرط کے ساتھ منع فرمائی ہے۔ (اس حدیث کو طبرانی نے اوسط میں اسی طریق سے نقل کیا ہے اور وہ غریب ہے۔)

اردو ترجمہ · UrduUnverified translation

حضرت عمرو بن شعیب ہی اپنے والد (شعیب) سے اور وہ (شعیب) اپنے دادا (عبداللہ بن عمرو رضی اللہ عنہما ) سے روایت کرتے ہیں‘ وہ فرماتے ہیں کہ رسول اللہ صلی اللہ علیہ وسلم نے بیع عربان سے منع فرمایا۔ (اسے امام مالک رحمہ اللہ نے روایت کیا ہے۔ اور فرمایا: مجھے عمرو بن شعیب سے یہ روایت پہنچی ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ وہ فرماتے ہیں کہ میں نے بازار سے روغن (زیتون) خریدا۔ جب میرا سودا طے ہوگیا تو مجھے ایک آدمی ملا جس نے مجھے اچھا منافع دینے کی پیش کش کی۔ میں نے اس آدمی سے سودا طے کرنے کا ارادہ کر لیا‘ اتنے میں پیچھے سے کسی نے میرا بازو پکڑ لیا۔ میں نے مڑ کر دیکھا تو وہ حضرت زید بن ثابت رضی اللہ عنہ تھے۔ انھوں نے کہا: جس جگہ سے تم نے اسے خریدا ہے‘ اسی جگہ پر اسے فروخت نہ کرو حتی کہ اسے اٹھا کر اپنے گھر لے جاؤ کیونکہ رسول اللہ صلی اللہ علیہ وسلم نے جہاں سے چیزیں خریدی جائیں وہیں پر فروخت کرنے سے منع فرمایا ہے‘ جب تک کہ تاجر و سوداگر حضرات اس خریدے ہوئے مال و اسباب کو اپنے گھروں میں نہ لے جائیں۔ (اسے احمد اور ابوداود نے روایت کیا ہے اور یہ الفاظ ابوداود کے ہیں‘ نیز ابن حبان اور حاکم نے اسے صحیح کہاہے۔)

اردو ترجمہ · UrduUnverified translation

حضرت ابن عمر رضی اللہ عنہما ہی سے روایت ہے‘ وہ فرماتے ہیں کہ میں نے عرض کیا: اے اللہ کے رسول! میں بقیع میں اونٹوں کی تجارت کرتا ہوں۔ دینار میں فروخت کر کے درہم وصول کرتا ہوں اور (کبھی) میں فروخت تو درہم میں کرتا ہوں اور وصول دینار کرتا ہوں (یعنی) درہم کے بدلے میں دینار لیتا ہوں اور دینار کے بدلے میں درہم دیتا ہوں۔ تو رسول اللہ صلی اللہ علیہ وسلم نے فرمایا: ’’کوئی حرج نہیں‘ اگر تم اسی روز کے بھاؤ سے ان کا تبادلہ کر لو اور تم دونوں کے ایک دوسرے سے جدا ہونے سے پہلے رقم کا کوئی حصہ کسی کے ذمے باقی نہ رہے۔‘‘ (اسے پانچوں نے روایت کیا ہے اور حاکم نے صحیح کہا ہے۔)

اردو ترجمہ · UrduUnverified translation

حضرت ابن عمر رضی اللہ عنہما ہی سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے نجش سے منع فرمایا ہے۔ (بخاری و مسلم)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ نبی صلی اللہ علیہ وسلم نے بیع محاقلہ‘ مزابنہ‘ مخابرہ اور ثنیا سے منع فرمایا ہے مگر اس صورت میں (بیع ثنیا) جائز ہے کہ اس کی تعیین کر لی جائے۔ (اسے ابن ماجہ کے سوا پانچوں نے روایت کیا ہے اور ترمذی نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے بیع محاقلہ‘ مخاضرہ‘ ملامسہ‘ منابذہ اور مزابنہ سے منع فرمایا ہے۔ (بخاری)

اردو ترجمہ · UrduUnverified translation

حضرت طاوس حضرت ابن عباس رضی اللہ عنہما سے روایت کرتے ہیں‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’تجارتی قافلوں کو آگے جا کر نہ ملو اور کوئی شہری کسی دیہاتی کا سامان نہ بیچے۔‘‘ میں نے ابن عباس رضی اللہ عنہما سے سوال کیا کہ ’’شہری دیہاتی کا سامان فروخت نہ کرے‘‘ کا کیا مطلب ہے ؟ ا نھوں نے فرمایا: شہری دیہاتی کا دلال نہ بنے۔ (بخاری و مسلم۔ اور یہ الفاظ بخاری کے ہیں)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’باہر سے شہر میں غلہ لانے والوں کو آگے جا کر نہ ملو۔ جس (تاجر) سے راستے ہی میں ملاقات کر کے اس کا سامان خرید لیا گیا تو منڈی میں پہنچنے کے بعد مال کے مالک (تاجر) کو اختیار ہے (چاہے سودا باقی رکھے یا منسوخ کر دے۔‘‘) (مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے منع فرمایا ہے کہ کوئی شہری کسی دیہاتی کا سامان بیچے۔ اور (فرمایا): ’’اگر سودا خریدنے کا ارادہ نہ ہو تو بھاؤ مت بڑھاؤ۔ اور کوئی شخص اپنے بھائی کی بیع پر بیع نہ کرے اور نہ اپنے بھائی کے پیغام نکاح پر پیغام نکاح ہی دے۔ اور کوئی عورت اپنی (مسلمان) بہن کی طلاق کا تقاضا نہ کرے کہ جو اس کا حصہ ہے وہ خود حاصل کر لے۔‘‘ (بخاری و مسلم) اور صحیح مسلم میں ہے: ’’کوئی مسلمان دوسرے مسلمان کے سودے پر سودا نہ کرے۔‘‘

اردو ترجمہ · UrduUnverified translation

حضرت ابوایوب انصاری رضی اللہ عنہ سے روایت ہے‘ وہ فرماتے ہیں کہ میں نے رسول اللہ صلی اللہ علیہ وسلم سے سنا‘ آپ فرما رہے تھے: ’’جس نے ماں اور اس کے بچے کے درمیان جدائی ڈالی‘ اللہ تعالیٰ قیامت کے روز اس کے اور اس کے احباء و اعزہ کے درمیان جدائی ڈال دے گا۔‘‘ (اسے احمد نے روایت کیا ہے‘ نیز ترمذی اور حاکم نے اسے صحیح کہا ہے‘ لیکن اس کی سند میں کلام ہے۔ اور اس کا شاہد موجود ہے۔)

اردو ترجمہ · UrduUnverified translation

حضرت علی بن ابی طالب رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے مجھے حکم دیا کہ میں دو غلام بھائیوں کو فروخت کروں۔ میں نے ان دونوں کو الگ الگ آدمیوں کے ہاتھ فروخت کر دیا اور پھر آپ سے اس کا ذکر کیا تو آپ نے فرمایا: ’’دونوں کو جا کر واپس لے آؤ اور دونوں کو اکٹھا ہی فروخت کرو۔‘‘ (اسے احمد نے روایت کیا ہے۔ اس کے راوی ثقہ ہیں اور اسے ابن خزیمہ‘ ابن جارود‘ ابن حبان‘ حاکم‘ طبرانی اور ابن قطان نے صحیح قرار دیا ہے۔)

اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم کے عہد میں مدینہ منورہ میں چیزوں کے بھاؤ چڑھ گئے۔ لوگوں نے عرض کیا: اے اللہ کے رسول! اشیاء کے نرخ (بڑے) تیز ہو گئے ہیں‘ آپ ہمارے لیے (ان کے) نرخ مقرر فرما دیں۔ رسول اللہ صلی اللہ علیہ وسلم نے فرمایا: ’’نرخ کا تعین کرنے والا تو اللہ تعالیٰ ہی ہے‘ وہی تنگی کرنے والا‘ فراخی کرنے والا اور رازق ہے۔ میں چاہتا ہوں کہ جب میں اللہ تعالیٰ سے ملوں تو کوئی شخص جان و مال کی بابت ظلم کی بنا پر مجھ سے مطالبہ کرنے والا نہ ہو۔‘‘ (نسائی کے سوا اسے پانچوں نے روایت کیا ہے اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت معمر بن عبداللہ رضی اللہ عنہما سے روایت ہے‘ وہ رسول اللہ صلی اللہ علیہ وسلم سے بیان کرتے ہیں کہ آپ نے فرمایا: ’’خطا کار کے سوا ذخیرہ اندوزی کوئی نہیں کرتا۔‘‘ (مسلم)

اردو ترجمہ · UrduUnverified translation

حضرت ابوہریرہ رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’(فروخت کرتے وقت) اونٹوں اور بھیڑ بکریوں کا دودھ ان کے تھنوں میں نہ روکو۔ جو شخص ایسا جانور خرید لے تو اسے اس کا دودھ دوہنے کے بعد دو باتوں میں سے بہتر کے اختیار کرنے کا حق حاصل ہے‘ چاہے اس جانور کو اپنے پاس رکھ لے اور چاہے تو ایک صاع کھجور ساتھ دے کر واپس کر دے۔‘‘ (بخاری و مسلم) اور مسلم کی روایت میں ہے: ’’اسے تین دن تک اختیار ہے۔‘‘ اور مسلم کی ایک دوسری روایت جسے بخاری نے بھی تعلیقاً نقل کیا ہے‘ اس میں ہے: ’’اس کے ساتھ عمدہ گندم نہیں بلکہ ایک صاع کسی اور کھانے والی چیز سے واپس کرے۔‘‘ امام بخاری رحمہ اللہ بیان کرتے ہیں کہ اکثر روایات میں کھجور کا ذکر ہے۔

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے کہ جو شخص ایسی بکری خریدے جس کا دودھ تھنوں میں روک دیا گیا ہو‘ پھر وہ اسے واپس کرے تو اسے چاہیے کہ اس کے ساتھ ایک صاع واپس کرے۔ (بخاری) اور اسماعیلی نے یہ اضافہ نقل کیا ہے کہ ایک صاع کھجوریں ہوں۔

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم کا گزر اناج کے ایک ڈھیر کے قریب سے ہوا۔ آپ نے اس میں اپنا ہاتھ داخل کیا تو آپ کی انگلیوں نے نمی محسوس کی۔ آپ نے فرمایا: ’’اے اناج کے مالک! یہ کیا ماجرا ہے؟‘‘ اس نے عرض کیا: اے اللہ کے رسول! اس پر بارش برس گئی تھی۔ آپ نے فرمایا: ’’پھر تو نے اس (نمی زدہ حصے) کو اناج کے اوپر کیوں نہ ڈال دیا تاکہ (خریدار) لوگ اسے دیکھ لیتے۔ جس نے دھوکا دیا اس کا مجھ سے کوئی تعلق نہیں۔‘‘(مسلم)

اردو ترجمہ · UrduUnverified translation

حضرت عبداللہ رضی اللہ عنہ اپنے والد حضرت بریدہ رضی اللہ عنہ سے بیان کرتے ہیں کہ رسول اللہ صلی اللہ علیہ وسلم نے فرمایا: ’’جس شخص نے انگوروں کو ان کے اتارنے کے ایام میں روک لیا تاکہ اسے کسی شراب بنانے والے کے ہاتھ فروخت کرے تو وہ جانتے بوجھتے آتش جہنم میں داخل ہوا۔‘‘ (اسے طبرانی نے اوسط میں حسن سند سے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’آمدنی کا حق دار وہی ہے جو ضامن ہے۔‘‘ (اسے پانچوں نے روایت کیا ہے۔ بخاری اور ابوداود نے ضعیف جبکہ ترمذی‘ ابن خزیمہ‘ ابن جارود‘ ابن حبان‘ حاکم اور ابن قطان نے اسے صحیح قرار دیا ہے۔)

اردو ترجمہ · UrduUnverified translation

حضرت عروہ بارقی رضی اللہ عنہ سے روایت ہے کہ نبی صلی اللہ علیہ وسلم نے انھیں قربانی کا جانور یا بکری خریدنے کے لیے ایک دینار عطا فرمایا۔ انھوں نے ایک دینار کے عوض دو بکریاں خریدیں‘ پھر ان دو میں سے ایک کو ایک دینار کے عوض فروخت کر دیا اور ایک بکری اور ایک دینار لے کر آپ کی خدمت میں حاضر ہوئے۔ آپ نے ان کے لیے ان کی تجارت میں برکت کی دعا فرمائی‘ چنانچہ وہ ایسے تھے کہ اگر مٹی بھی خرید لیتے تو اس میں بھی انھیں ضرور نفع حاصل ہوتا۔ (نسائی کے سوا پانچوں نے اسے روایت کیا ہے اور امام بخاری رحمہ اللہ نے ایک حدیث کے ضمن میں اسے روایت کیا ہے‘ مگر یہ الفاظ نقل نہیں کیے اور ترمذی نے حضرت حکیم بن حزام رضی اللہ عنہ سے مروی حدیث کو اس کے لیے بطور شاہد بیان کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے کہ نبی صلی اللہ علیہ وسلم نے جانوروں کے پیٹ کے بچوں کو ان کی پیدائش سے پہلے خریدنے سے منع فرمایا اور ان کے تھنوں میں (جمع شدہ) دودھ کو خریدنے سے منع فرمایا اور بھاگے ہوئے غلام کو خریدنے سے منع فرمایا اور اموال غنیمت کو تقسیم سے پہلے خریدنے سے منع فرمایا اور صدقات کو قبضے میں لینے سے پہلے خریدنے سے منع فرمایا اور غوطہ لگانے والے کے غوطے (سے حاصل ہونے والی چیز کی پیشگی خریداری) سے منع فرمایا۔ (اسے ابن ماجہ‘ بزار اور دارقطنی نے ضعیف سند سے روایت کیا ہے۔)