اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’سات قسم کے لوگوں کو اللہ تعالیٰ اپنے سائے میں جگہ دے گا جبکہ اس روز اس کے سائے کے سوا کوئی اور سایہ نہ ہوگا۔‘‘ پھر مکمل حدیث بیان کی۔ اور اس میں ہے کہ (ان سات آدمیوں میں وہ آدمی بھی شامل ہے:) ’’جو اس قدر پوشیدہ طور پر صدقہ دے کہ اس کے بائیں ہاتھ کو خبر بھی نہ ہو کہ دائیں ہاتھ نے کیا خرچ کیا ہے۔‘‘(بخاری و مسلم)

اردو ترجمہ · UrduUnverified translation

حضرت عقبہ بن عامر رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے ہوئے سنا ہے: ’’ہر آدمی اپنے صدقے کے سائے میں کھڑا ہوگا یہاں تک کہ لوگوں کا فیصلہ ہوجائے۔‘‘ (اسے ابن حبان اورحاکم نے بیان کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’جو مسلمان کسی برہنہ مسلمان کو کپڑا پہنائے گا تو اللہ تعالیٰ اسے جنت کی سبز پوشاک پہنائے گا۔ اور جو مسلمان کسی بھوکے مسلمان کو کھانا کھلائے گا اللہ تعالیٰ اسے جنت کے پھلوں سے کھلائے گا۔ اور جو مسلمان پیاسے مسلمان کو (پانی یا مشروب) پلائے گا تو اللہ تعالیٰ اسے جنت کی خالص مہربند شراب سے پلائے گا۔‘‘ (اسے ابوداود نے روایت کیا ہے اور اس کی سند میں کمزوری ہے۔)

اردو ترجمہ · UrduUnverified translation

حضرت حکیم بن حزام رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’اوپر والا ہاتھ نیچے والے ہاتھ سے بہتر ہے۔ اور (صدقے کا) آغاز و ابتدا ان سے کر جن کی تو کفالت اور عیال داری کرتا ہے۔ اور بہتر صدقہ وہ ہے جس کے دینے کے بعد بھی دینے والا غنی رہے۔ جو شخص دست سوال دراز کرنے سے پرہیز کرے گا‘ اللہ تعالیٰ اسے بچا لے گا۔ اور جو شخص بے نیازی کا مظاہرہ کرتا ہے اللہ تعالیٰ اسے بے نیاز کر دیتا ہے۔‘‘ (بخاری و مسلم- متن حدیث کے الفاظ بخاری کے ہیں۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم سے پوچھا گیا کہ کون سا صدقہ افضل ہے؟ آپ نے فرمایا: ’’کم مال والے کا محنت مشقت کر کے صدقہ دینا۔ اور صدقے کی ابتدا ان سے کرو جن کی کفالت کے تم ذمہ دار ہو۔‘‘ (اسے احمداور ابوداود نے روایت کیا ہے اور ابن خزیمہ‘ ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’صدقہ و خیرات کرو۔‘‘ ایک آدمی نے کہا: اے اللہ کے رسول! میرے پاس ایک دینار ہے۔ آپ نے فرمایا: ’’اسے تو اپنی جان پر صدقہ کر۔‘‘ اس نے کہا کہ میرے پاس ایک اور بھی ہے‘ آپ نے فرمایا: ’’اسے اپنی اولاد پر صدقہ (خرچ) کر۔‘‘ اس نے پھر کہا: میرے پاس ایک اور بھی ہے۔ آپ نے فرمایا: ’’اسے اپنی اہلیہ پر صدقہ (خرچ) کر۔‘‘ اس نے پھر کہا کہ میرے پاس ایک اور بھی ہے۔ آپ نے فرمایا: ’’اسے اپنے خادم پر صدقہ (خرچ) کر۔‘‘ وہ کہنے لگا: میرے پاس ایک اور بھی ہے۔ آپ نے فرمایا: ’’اس کے خرچ کرنے کی بابت تو بہتر جانتا ہے۔‘‘ (اسے ابوداود اور نسائی نے روایت کیا ہے اور ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ انھوں نے کہا کہ نبی صلی اللہ علیہ وسلم نے فرمایا: ’’جو عورت اپنے گھر کے کھانے سے کچھ خیرات کرے بشرطیکہ اس کی نیت گھر بگاڑنے کی نہ ہو توجو کچھ وہ خیرات کرے گی اس کا اجر و ثواب ضرور اسے ملے گا اور اس کے شوہر کو بھی‘ کمانے کی وجہ سے ثواب ہوگا۔ اور اسی طرح خزانچی کو ثواب ملے گا‘ نیز کسی کا ثواب دوسرے کے ثواب کو کچھ بھی کم نہیں کرے گا۔‘‘ (بخاری و مسلم)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے کہ حضرت عبداللہ بن مسعود رضی اللہ عنہ کی اہلیہ حضرت زینب رضی اللہ عنہا آئیں اور عرض کیا: اے اللہ کے رسول! آپ نے آج صدقہ کرنے کا حکم فرمایا ہے۔ میرے پاس میرا ذاتی زیور ہے‘ میں چاہتی ہوں کہ اسے صدقہ کر دوں مگر حضرت عبداللہ بن مسعود رضی اللہ عنہ کا خیال ہے کہ وہ اور اس کی اولاد زیادہ مستحق ہیں کہ انھی کو صدقہ دوں۔ تو نبی صلی اللہ علیہ وسلم نے فرمایا: ’’ابن مسعود رضی اللہ عنہ نے ٹھیک کہا ہے۔ تیرا شوہر اور تیری اولاد تیرے صدقے کے زیادہ مستحق ہیں۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جو آدمی (پیشہ ور گدا گر ) لوگوں سے ہمیشہ سوال کرتا اور بھیک مانگتا رہتا ہے‘ وہ قیامت کے روز ایسی حالت میں آئے گا کہ اس کے چہرے پر گوشت تک نہ ہوگا۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو آدمی لوگوں سے ان کے مالوں کا سوال کرتا ہے (ضرورت کی وجہ سے نہیں بلکہ) اپنا مال بڑھانے کی غرض سے تو وہ اپنے لیے (جہنم کے) انگارے ہی کا سوال کرتا ہے۔ اب اس کی مرضی ہے چاہے انھیں کم کر لے یا زیادہ۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت زبیر بن عوام رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’اگر تم میں سے کوئی شخص رسی پکڑے‘ پھر لکڑیوں کا گٹھا (جنگل سے) اپنی پشت پر اٹھا کر لائے اور اسے فروخت کرے‘ جس کی وجہ سے اللہ تعالیٰ اس کی عزت و آبرو محفوظ رکھے‘ تو یہ اس کے لیے سوال کرنے سے بہتر ہے کہ لوگ اسے دیں یا نہ دیں۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت سمرہ بن جندب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’سوال کرنا تو گویا زخم لگانا اور خراشیں ڈالنا ہے جس سے انسان اپنے چہرے کو زخمی کرتا ہے‘ سوائے اس شخص کے جو سربراہِ مملکت سے سوال کرے یا مجبوری کی وجہ سے سوال کرے۔‘‘ (اسے ترمذی نے روایت کیا ہے اور صحیح قرار دیا ہے۔)