اردو ترجمہ · UrduUnverified translation

حضرت بُرَیدہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’قاضی تین قسم کے ہیں‘ دو دوزخی ہیں اور ایک جنتی: وہ شخص جس نے حق کو پہچانا اور اس کے مطابق فیصلہ کیا وہ جنتی ہے۔ اور وہ شخص جس نے حق کی پہچان کر لی مگر فیصلہ حق کے ساتھ نہ دیا بلکہ فیصلہ کرنے میں ظلم کیا تو وہ دوزخی ہے اور وہ شخص جس نے حق کو نہ پہچانا بلکہ لوگوں میں جہالت اور لاعلمی سے فیصلہ کیا تو وہ بھی دوزخی ہے۔‘‘ (اسے چاروں نے روایت کیا ہے اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس شخص کو فیصلہ کرنے پر مامور کیا گیا‘ اسے بغیر چھری کے ذبح کر دیا گیا۔‘‘ (اسے احمد اور چاروں نے روایت کیا ہے۔ ابن خزیمہ اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’بے شک تم لوگ ضرور حکومت کی حرص اور خواہش کرو گے اور وہ قیامت کے روز لازماً باعث ندامت ہوگی۔ چنانچہ اچھی ہے دودھ پلانے والی اور بری ہے دودھ چھڑانے والی۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت عمرو بن عاص رضی اللہ عنہ سے روایت ہے کہ انھوں نے رسول اللہ صلی اللہ علیہ وسلم کو فرماتے ہوئے سنا: ’’جب کوئی حاکم فیصلہ کرتے وقت خوب غور و خوض کرے‘ پھر صحیح فیصلہ کرنے میں کامیاب بھی ہو جائے تو اسے دگنا ثواب ملتا ہے اور جب وہ فیصلہ کرنے میں غورو تدبر تو کرے مگر فیصلہ کرنے میں خطا کر جائے تو اسے ایک اجر ملے گا۔‘‘(بخاری و مسلم)

اردو ترجمہ · UrduUnverified translation

حضرت ابوبکرہ رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو فرماتے سنا ہے: ’’ کوئی بھی شخص دو آدمیوں کے درمیان غصے کی حالت میں فیصلہ نہ کرے۔‘‘ (بخاری و مسلم)

اردو ترجمہ · UrduUnverified translation

حضرت علی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب دو آدمی تمھارے پاس فیصلے کے لیے آئیں تو کسی ایک کے حق میں فیصلہ نہ کرو جب تک دوسرے کی بات نہ سن لو۔ اس سے تمھیں معلوم ہو جائے گا کہ تم نے فیصلہ کیسے کرنا ہے۔‘‘ حضرت علی رضی اللہ عنہ نے فرمایا: اس تعلیم کے بعد سے میں اسی طرح فیصلہ کرتا ہوں۔ (اسے احمد‘ ابوداود اور ترمذی نے روایت کیا ہے اور ترمذی نے اسے حسن قرار دیا ہے اور ابن مدینی نے اسے قوی کہا ہے اور ابن حبان نے اسے صحیح کہا ہے۔ اور حاکم کے ہاں ابن عباس رضی اللہ عنہما کی حدیث اس کا شاہد ہے۔)

اردو ترجمہ · UrduUnverified translation

حضرت ام سلمہ رضی اللہ عنہا سے روایت ہے ‘ وہ کہتی ہیں کہ رسول اللہ صلی اللہ علیہ وسلم نے فرمایا: ’’بے شک تم لوگ اپنے جھگڑے میرے پاس لے کر آتے ہو اور بسااوقات تم میں سے کوئی‘ مخالف فریق کی بہ نسبت اپنے دلائل بڑی خوش اسلوبی سے بیان کرتا ہے تو میں نے اس سے جو کچھ سنا ہوتا ہے اسی کے مطابق اس کے حق میں فیصلہ کر دیتا ہوں۔ چنانچہ میں جسے اس کے بھائی کے حق میں سے کوئی چیز دوں تو میں سرا سر اسے آگ کا ٹکڑا دے رہا ہوں۔‘‘ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ میں نے رسول اللہ صلی اللہ علیہ وسلم کو فرماتے ہوئے سنا: ’’وہ امت کیسے پاک ہو سکتی ہے جس میں طاقت ور سے کمزور کا حق نہ لیا جا سکے۔‘‘ (اسے ابن حبان نے روایت کیا ہے۔ اور بزار کے ہاں حضرت بریدہ رضی اللہ عنہ کی حدیث اس کی شاہد ہے اور اس کا ایک اور شاہد سنن ابن ماجہ میں حضرت ابو سعید رضی اللہ عنہ کے حوالے سے بھی مروی ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو فرماتے سنا ہے: ’’قیامت کے روز عادل قاضی کو حساب کے لیے طلب کیا جائے گا وہ اپنے حساب کی شدت کو محسوس کر کے آرزو کرے گا کہ کاش اس نے اپنی عمر میں دو شخصوں کے درمیان ایک بھی فیصلہ نہ کیا ہوتا۔‘‘ (اسے ابن حبان نے روایت کیا ہے اور بیہقی نے بھی اسے نقل کیا ہے۔) اور بیہقی کے الفاظ ہیں: ’’ایک کھجور کا بھی فیصلہ نہ کیا ہوتا۔‘‘

اردو ترجمہ · UrduUnverified translation

حضرت ابوبکرہ رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’ایسی قوم ہرگز فلاح نہیں پا سکتی جو عورت کو اپنا حاکم و فرمانروا بنا لے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابومریم ازدی رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’جس شخص کو اللہ تعالیٰ نے مسلمانوں کے کسی کام کا حاکم اور ذمہ دار بنا دیا اور وہ ان کی ضروریات اور حاجات پوری کرنے سے گریز کرتا رہا (حجاب میں رہا) تو اللہ تعالیٰ بھی اس کی حاجت پوری کرنے سے حجاب فرما لے گا۔‘‘ (اسے ابوداود اور ترمذی نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فیصلے میں رشوت دینے والے اور رشوت لینے والے پر لعنت فرمائی ہے۔ (اسے احمد اور چاروں نے روایت کیا ہے۔ اور ترمذی نے اسے حسن قرار دیا ہے اور ابن حبان نے اسے صحیح کہا ہے۔ نسائی کے سوا چاروں کے ہاں حضرت عبداللہ بن عمرو رضی اللہ عنہما کی حدیث اس کی شاہد ہے۔)

اردو ترجمہ · UrduUnverified translation

حضرت عبداللہ بن زبیر رضی اللہ عنہما سے روایت ہے کہ رسول اللہ صلی اللہ علیہ وسلم نے حکم دیا کہ فریقین حاکم کے روبرو بیٹھیں۔ (اسے ابوداود نے روایت کیا ہے اور حاکم نے اسے صحیح قرار دیا ہے۔)