اردو ترجمہ · Urdu

حضرت طلحہ بن عبید اللہ رضی اللہ عنہ سے روایت ہے ، کہتے ہیں کہ ایک آدمی رسول اللہ ﷺ کی خدمت میں حاضر ہوا ، وہ اہل نجد میں سے تھا ، سر کے بال بکھرے ہوئے تھے ، اس کی آواز کی بھنبھناہٹ تو سنائی دیتی تھی لیکن وہ جو کچھ کہہ رہا تھا ہم اسے سمجھ نہیں پا رہے تھے ، یہاں تک کہ وہ قریب آ گیا تو یکایک ( ہمیں معلوم ہو گیا کہ ) وہ اسلام کے متعلق سوال کر رہا تھا ، چنانچہ رسول اللہ ﷺ نے اس سے فرمایا :’’ ( اسلام کا ایک رکن ) دن اور رات میں پانچ نمازیں ( قائم کرنا ہے ) ۔ ‘‘ اس نے دریافت کیا کہ کیا مجھ پر ان ( پانچ ) کے علاوہ ( نمازیں بھی لازم ) ہیں ؟ آپ ﷺ نے فرمایا :’’ نہیں ، الا یہ کہ تو ( خوشی سے ) کوئی نفل ادا کرے ۔‘‘ ( پھر ) رسول اللہ ﷺ نے فرمایا :’’ اور ( اسلام کا ایک رکن ) ماہِ رمضان کے روزے رکھنا ( ہے ) ۔‘‘ اس نے پوچھا کہ کیا مجھ پر اس ( رمضان ) کے علاوہ بھی کچھ فرض ہے ؟ رسول اللہ ﷺ نے فرمایا :’’ نہیں الا یہ کہ تو کوئی نفلی روزہ ( رکھنا چاہے تو ) رکھ لے ‘‘ حضرت طلحہ رضی اللہ عنہ کہتے ہیں کہ رسول اللہ ﷺ نے زکاۃ کا بھی ذکر فرمایا تو اس نے پوچھا کہ کیا مجھ پر اس کے علاوہ بھی ( فرض ) ہے ؟ آپ ﷺ نے فرمایا :’’ نہیں ، مگر یہ کہ تو کوئی نفلی صدقہ کر سکتا ہے ۔‘‘ حضرت طلحہ رضی اللہ عنہ کہتے ہیں کہ پھر وہ اس حال میں واپس ہوا کہ وہ یہ کہہ رہا تھا ۔ اللہ کی قسم ! میں نہ تو اس سے کچھ زیادہ کروں گا اور نہ کم کروں گا ۔ تو رسول اللہ ﷺ نے فرمایا :’’ اگر وہ سچا ثابت ہوا تو ( یقیناً ) کامیابی پا گیا ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جب تم میں سے کوئی شخص سو جاتا ہے تو شیطان اس کی گدی پر تین گرہیں باندھ دیتا ہے اور ہر گرہ مارتے ہوئے کہتا ہے کہ تجھ پر بڑی لمبی رات باقی ہے لہٰذا تو سویا ہی رہ ، پھر اگر آدمی بیدار ہو کر اللہ کا ذکر کر لیتا ہے تو ایک گرہ کھل جاتی ہے ، پھر اگر وہ وضو کر لے تو دوسری گرہ بھی کھل جاتی ہے اور پھر اگر نماز پڑھنے لگے تو تیسری گرہ بھی کھل جاتی ہے ۔ چنانچہ وہ اس حال میں صبح کرتا ہے کہ وہ ( نیکی کے معاملے میں چست سرگرم ، مستعد اور ) ہشاش بشاش اور پاکیزہ دل والا ہوتا ہے ورنہ ( بصورت دیگر ) وہ اس حال میں صبح کرتا ہے کہ خبیث دل والا اور سست ہوتا ہے ۔‘‘