اردو ترجمہ · Urdu

حضرت معاذ بن جبل رضی اللہ عنہ سے روایت ہے کہتے ہیں کہ رسول اللہ ﷺ نے مجھے ( یمن کی طرف بھیجتے وقت جو آخری وصیت فرمائی ، جس وقت کہ میں نے رکاب میں اپنا پاؤں رکھ لیا تھا ، آپ ﷺ نے مجھ سے فرمایا :’’ اے معاذ بن جبل ! لوگوں کے لیے اپنا اخلاق خوبصورت رکھنا ( اور خوش خلقی سے پیش آنا ) ۔‘‘

اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے ، کہتی ہیں کہ رسول اللہ ﷺ کو جب کبھی بھی کوئی سے دو کاموں میں اختیار دیا گیا ، تو ضرور آپ نے ان میں سے زیادہ آسان ( اور زیادہ تخفیف والے ) کام کو اختیار کیا ، جب تک کہ وہ ( آسان کام ) گناہ نہ ہوتا ، چنانچہ اگر وہ گناہ ہوتا تو آپ ﷺ لوگوں میں سب سے بڑھ کر اس سے دور رہنے والے ہوتے اور رسول اللہ ﷺ نے ( کبھی ) اپنی ذات کے لیے انتقام نہیں لیا ، الّا یہ کہ اللہ کی حرمت کو پامال کیا جاتا تو پھر آپ ﷺ اس کی وجہ سے اللہ کی خاطر انتقام لیتے تھے ۔

اردو ترجمہ · Urdu

حضرت علی بن حسین بن علی بن ابی طالب رحمہ اللہ ( المعروف زین العابدین ) سے روایت ہے کہ بلاشبہ رسول اللہ ﷺ نے فرمایا :’’ آدمی کے اسلام کے حسن ( اور خوبی ) میں سے یہ بھی ہے کہ وہ اس چیز کو چھوڑ دے جو اسے مقصود نہیں ہے ۔‘‘

اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے ، کہتی ہیں کہ ایک آدمی نے رسول اللہ ﷺ سے ( آنے کی ) اجازت طلب کی ، حضرت عائشہ رضی اللہ عنہا کہتی ہیں کہ اس وقت میں آپ ﷺ کے ہمراہ گھر میں تھی ، تو رسول اللہ ﷺ نے ( میرے پاس ) فرمایا :’’ یہ قبیلے کا برا آدمی ہے ۔‘‘ پھر آپ ﷺ نے اسے اجازت دے دی ، سیدہ عائشہ رضی اللہ عنہا فرماتی ہیں کہ میں ابھی زیادہ دیر ٹھہری نہ تھی کہ میں نے سنا کہ رسول اللہ ﷺ اس کے ساتھ ہنس رہے تھے ۔ پھر جب وہ آدمی چلا گیا تو میں نے عرض کیا : اے اللہ کے رسول ﷺ ! آپ نے اس کے متعلق جو کچھ بھی کہا سو کہا ، پھر آپ کو زیادہ دیر نہ گزری تھی کہ آپ ﷺ اس کے ساتھ ہنسنے لگے تو رسول اللہ ﷺ نے فرمایا :’’ یقیناً لوگوں میں سے بدترین آدمی وہ ہے کہ لوگ اس کے شر کی وجہ سے اس سے بچیں ۔‘‘

اردو ترجمہ · Urdu

کعب احبار رحمہ اللہ سے روایت ہے ، انھوں نے کہا : جب تم یہ جاننا چاہو کہ بندے کے لیے اس کے رب کے ہاں کیا کچھ ہے ( اچھا انجام یا برا انجام ) تو دیکھو کس طرح کی تعریف اس کا پیچھا کرتی ہے ۔

اردو ترجمہ · Urdu

یحیی بن سعید رحمہ اللہ سے روایت ہے کہ مجھے یہ خبر پہنچی : بے شک آدمی اپنے اچھے اخلاق کی بدولت ساری رات ( نمازِ تہجد میں ) قیام کرنے والے اور دوپہروں کے وقت میں پیاسا رہنے والے ( روزہ دار ) کا درجہ پا لیتا ہے ۔

اردو ترجمہ · Urdu

سعید بن مسیب رحمہ اللہ سے روایت ہے ، فرماتے ہیں : کیا میں تمھیں بہت سی نمازوں اور صدقات سے بھی بہتر چیز کی خبر نہ دوں ؟ لوگوں نے کہا کہ کیوں نہیں ، تو انھوں نے فرمایا : ( وہ چیز ) آپس کی اصلاح کرنا ( ہے ) اور اپنے آپ کو بغض ( باہمی نفرت ) سے بچاؤ کیونکہ بلاشبہ وہ تو مونڈ دینے والی ( خصلت ) ہے ۔

اردو ترجمہ · Urdu

امام مالک رحمہ اللہ کو پہنچا کہ رسول اللہ ﷺ نے فرمایا :” میں اس واسطے بھیجا گیا کہ اخلاق کی خوبیوں کو پورا کردوں ۔“