اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بیشک حضرت سعد بن عبادہ رضی اللہ عنہ نے رسول اللہ ﷺ سے عرض کیا کہ مجھے اس بارے میں خبر دیجیے کہ اگر میں اپنی بیوی کے ساتھ کسی آدمی کو پا لوں تو کیا اسے مہلت دوں یہاں تک کہ چار گواہ لے کر آؤں ؟ تو رسول اللہ ﷺ نے فرمایا :’’ ہاں ‘‘۔

اردو ترجمہ · Urdu

سعید بن مسیب رحمہ اللہ سے روایت ہے ( کہتے ہیں ) کہ اہلِ شام میں سے ایک آدمی جسے ابن خیبری رحمہ اللہ کہا جاتا تھا ، نے مجھے خبر دی کہ اس نے اپنی بیوی کے ساتھ ایک آدمی کو پا لیا تو اسے یا دونوں کو ایک ساتھ قتل کر ڈالا ۔ حضرت معاویہ بن ابی سفیان رضی اللہ عنہما پر فیصلہ کرنا مشکل ہو گیا تو انھوں نے حضرت ابوموسیٰ اشعری رضی اللہ عنہ کی طرف ( یہ پیغام ) لکھا کہ وہ حضرت علی بن ابی طالب رضی اللہ عنہ سے اس بارے میں سوال کریں ۔ چنانچہ حضرت ابوموسیٰ اشعری رضی اللہ عنہ نے حضرت علی بن ابی طالب رضی اللہ عنہ سے اس بارے میں پوچھا تو حضرت علی رضی اللہ عنہ نے ان سے فرمایا ، یقیناً یہ چیز میرے علاقے ( عراق ) میں تو نہیں ہے ، میں تمھیں قسم دیتا ہوں کہ مجھے اس کے متعلق ( تفصیل سے ) بتاؤ ، تو حضرت ابوموسیٰ رضی اللہ عنہ نے کہا کہ حضرت معاویہ بن ابی سفیان رضی اللہ عنہ نے میری طرف لکھا تھا کہ میں آپ سے اس بارے میں پوچھوں تو حضرت علی رضی اللہ عنہ نے فرمایا : ( واقعی ) میں ابوالحسن ہوں ، ( فیصلہ یہ ہے کہ ) اگر وہ ( قاتل شوہر اس زنا کے دعوے پر ) چار گواہ نہ لا سکے تو اس کی رسّی ( مقتول کے ورثاء کے ہاتھوں میں ) دے دی جائے ۔