اردو ترجمہ · Urdu

طلحہ بن عبداللہ بن عوف رحمہ اللہ جو کہ اس حدیث کا سب سے زیادہ علم رکھنے والے تھے ، اور ابوسلمہ بن عبدالرحمن بن عوف ( دونوں ) سے روایت ہے کہ سیدنا عبدالرحمن بن عوف رضی اللہ عنہ نے اپنی بیوی ( ابوسلمہ کی والدہ تماضر بنت اصبغ رضی اللہ عنہا ) کو بتہ طلاق دے دی ۔ اس حال میں کہ وہ مریض تھے تو سیدنا عثمان بن عفان رضی اللہ عنہ نے انھیں ان کی عدت گزر جانے کے بعد بھی ( اپنے خاوند کے ترکے سے ) وراثت دی ۔

اردو ترجمہ · Urdu

( عبدالرحمن بن ہرمز ) اعرج رحمہ اللہ سے روایت ہے کہ بے شک سیدنا عثمان بن عفان رضی اللہ عنہ نے ( عبداللہ ) ابن مکمل رضی اللہ عنہ کی عورتوں کو اس کا وارث بنایا جبکہ ابن مکمل رضی اللہ عنہ نے ان کو اس حال میں طلاق دی تھی کہ وہ مریض تھے ۔

اردو ترجمہ · Urdu

ربیعہ بن ابی عبدالرحمن رحمہ اللہ سے روایت ہے ، ان کو یہ خبر پہنچی کہ سیدنا عبدالرحمن بن عوف رضی اللہ عنہ کی بیوی نے ان سے طلاق مانگی تو انھوں نے کہا کہ جب تجھے حیض آئے ، پھر تم حیض سے پاک ہو جاؤ تو مجھے بتانا ، لیکن انھیں ( ابھی ) حیض نہ آیا تھا یہاں تک کہ سیدنا عبدالرحمن بن عوف رضی اللہ عنہ ( اپنے آخری ) مرض میں مبتلا ہو گئے پھر ( ان کی بیوی کو حیض آیا اور ) جب وہ پاک ہوئیں تو انھوں نے خاوند کو اطلاع دے دی ، چنانچہ انھوں نے ان کو طلاق بتہ یعنی تین طلاقیں دے دیں ( راوی کہتے ہیں کہ ) یا ایک طلاق دے دی کہ جس کے علاوہ ان کے لیے بیوی پر کوئی اور طلاق باقی نہ تھی اور سیدنا عبدالرحمن بن عوف رضی اللہ عنہ بیمار تھے تو سیدنا عثمان بن عفان رضی اللہ عنہ نے انھیں عدت مکمل ہو جانے کے بعد بھی ان کا وارث بنایا ۔

اردو ترجمہ · Urdu

محمد بن یحیی بن حبان رحمہ اللہ سے روایت ہے ، کہتے ہیں کہ میرے دادا حضرت حبان ( انصاری ) رضی اللہ عنہ کے پاس دو بیویاں تھیں ، ایک ہاشمی خاندان کی اور ایک انصاریہ ، پھر انھوں نے انصاریہ بیوی کو اس حال میں طلاق دی کہ وہ ( ان کے بچے کو ) دودھ پلا رہی تھی ، پھر اسے ( عدت طلاق کے دوران پورا ) ایک سال گزر گیا ، پھر حضرت حبان رضی اللہ عنہ فوت ہو گئے اور انھیں حیض نہ آیا ، ( کیونکہ وہ دودھ پلا رہی تھی اور نفاس ختم ہونے کے بعد حیض آنے میں تاخیر ہو گئی ۔ حیض نہ آئے تو عدت طلاق تین ماہ ہوتی ہے اور حیض آتا ہو تو تین حیض اب دوسری بیوی کہتی کہ تین مہینے پورے ہو گئے تھے ، تیرا تعلق ختم ہو گیا تھا اس لیے ترکے کا آٹھواں حصہ صرف اور صرف میرا ہے اور وہ انصاریہ کہتی کہ میری عدت حیض سے شمار ہو گی اور حیض ابھی آیا نہیں ، لہٰذا نہ عدت ختم ، نہ تعلق ختم اس لیے خاوند کی وراثت کے آٹھویں حصے میں ہم دونوں شریک ہیں ) چنانچہ وہ کہنے لگیں کہ میں ان کی وارث بنتی ہوں ( کیونکہ ) مجھے ( ابھی تک ) حیض نہیں آیا ( اور عدت باقی ہے ) پھر دونوں سیدنا عثمان بن عفان رضی اللہ عنہ کے پاس جھگڑا لے کر گئیں تو سیدنا عثمان رضی اللہ عنہ نے ان کے لیے وراثت کا فیصلہ فرما دیا تو ہاشمیہ بیوی نے سیدنا عثمان رضی اللہ عنہ کو ملامت کی ( اور برا بھلا کہنے لگی سیدنا عثمان رضی اللہ عنہ فرمانے لگے کہ یہ فیصلہ تو تیرے چچا کے بیٹے کا ہے ، انھوں نے ہی ہمیں اس کا اشارہ دیا تھا ، سیدنا عثمان رضی اللہ عنہ سیدنا علی رضی اللہ عنہ کو مراد لے رہے تھے ۔

اردو ترجمہ · Urdu

ابن شہاب رحمہ اللہ سے روایت ہے ، وہ فرمایا کرتے تھے کہ جب آدمی اپنی بیوی کو اس حال میں تین طلاقیں دے کہ وہ ( آدمی ) بیمار ہو تو بلاشبہ بیوی اس کی وارث بنے گی ۔