اردو ترجمہ · Urdu

امام مالک رحمہ اللہ نے فرمایا کہ انھوں نے حضرت عمر بن خطاب رضی اللہ عنہ کی وہ تحریر پڑھی جو زکاۃ کے متعلق تھی ، وہ کہتے ہیں کہ میں نے اس میں ( یوں لکھا ہوا ) پایا ۔ بسم اللّٰہ الرحمن الرحیم یہ زکاۃ کی تحریر ہے ، چوبیس یا اس سے کم اونٹوں میں بکریاں ( زکاۃ کے طور پر دی جاتی ) ہیں ، ہر پانچ اونٹوں میں ایک بکری لازم ہے اور اس سے زیادہ میں ( پچیس سے لے کر ) پینتیس تک ایک سال کی اونٹنی ( زکاۃ ) ہے ، اگر ایک سالہ اونٹنی نہ ہو تو دو برس کا نر اونٹ ( کفایت کر جائے گا ) ، اور اس سے زیادہ میں پینتالیس تک دو سالہ اونٹنی ہے ، اور اس سے زیادہ میں ساٹھ تک تین برس کی اونٹنی ہے جو نر اونٹ کی جفتی کے قابل ہو اور اس سے زیادہ میں پچھتر تک چار سالہ اونٹنی ہے اور اس سے زیادہ میں نوے تک دو عدد دو سالہ اونٹنیاں ہیں اور اس سے زیادہ میں ایک سو بیس تک دو عدد تین سالہ اونٹنیاں ہیں جو نر کی جفتی کے قابل ہوں ، پھر اونٹوں میں سے جو اس سے بھی بڑھ جائیں تو ( ان کے چالیس چالیس اور پچاس پچاس کے گروپ بنائے جائیں گے اور ) ہر چالیس میں ایک عدد دو سالہ اونٹنی اور ہر پچاس میں ایک عدد تین سالہ اونٹنی ہے ۔ اور ( جنگل ، پہاڑ وغیرہ میں مفت گھاس ) چرنے والی بکریاں جب چالیس کو پہنچ جائیں تو ان میں ( چالیس سے لے کر ) ایک سو بیس تک کی ایک بکری ( زکاۃ ) ہے اور اس سے زیادہ میں دو سو تک دو بکریاں ہیں اور اس سے زیادہ میں تین سو تک تین بکریاں ہیں ، پھر جو بکریاں اس سے بھی زیادہ ہوں تو ہر سو میں ایک بکری ہے اور زکاۃ میں نہ سانڈ دیا جائے گا نہ بوڑھا جانور اور نہ عیب والا ، الا یہ کہ زکاۃ اکٹھی کرنے والا چاہے ( تو کسی ضرورت کے تحت ان کو بطور زکاۃ لے سکتا ہے ) اور زکاۃ کے خوف سے جدا جدا مالوں کو جمع نہ کیا جائے اور جمع شدہ مال کو الگ الگ نہ کیا جائے اور جو دو آدمی ( باہم ) شریک ہوں تو وہ برابری کے ساتھ آپس میں رجوع کریں گے اور چاندی میں جب کہ وہ پانچ اوقیہ ( دو سو درہم ) کو پہنچ جائے ، تو اس میں چالیسواں حصہ لازم ہے ۔