اردو ترجمہ · Urdu

نافع رحمہ اللہ سے روایت ہے کہ بے شک حضرت عبداللہ بن عمر رضی اللہ عنہ نے ایک بار مدینہ میں قربانی کی ، نافع رحمہ اللہ کہتے ہیں : انھوں نے مجھے حکم دیا کہ میں ان کے لیے ایک مینڈھا خرید کر لاؤں جو نر ہو ( خصی نہ ہو اور ) سینگوں والا ہو ، پھر میں اُسے لوگوں کی عیدگاہ میں عیدالاضحی کے دن ذبح کروں ، نافع رحمہ اللہ کہتے ہیں کہ میں نے ایسا ہی کیا پھر اس مینڈھے کو اٹھا کر حضرت عبداللہ بن عمر رضی اللہ عنہ کے پاس لایا گیا ، چنانچہ جب مینڈھا ذبح کر دیا گیا تو انھوں نے اپنا سر مونڈ لیا ، اس وقت وہ بیمار تھے ( اور ) مسلمانوں کے ہمراہ نماز عید کے لیے بھی حاضر نہ ہو سکے تھے ، نافع رحمہ اللہ کہتے ہیں کہ حضرت عبداللہ بن عمر رضی اللہ عنہ فرمایا کرتے تھے کہ جس شخص نے قربانی کی اس پر سر منڈانا واجب نہیں ، ( اور ) خود حضرت عبداللہ بن عمر رضی اللہ عنہ نے یہ کام ( استحباباً ) کیا تھا ۔